A biblioteca presenta o Mes dos libros, que se inicia o mércores cun recital do poeta Alfonso Pexegueiro e os músicos de Berriguetto, Anxo Pintos e Quico Comesaña
A BIBLIOTECA MUNICIPAL PRESENTA O SEU PROGRAMA “MES DO LIBROS”Un recital co poeta Alfonso Pexegueiro cos músicos Anxo Pintos e Quico Comesaña, de Berrogüetto, inicia as actividades o vindeiro mércores ás 20,30 h. A Biblioteca Pública Municipal de Tui presenta o seu programa de actividades que abrangue entre o 23 de abril, Día do Libro, e o 17 de maio, Día das Letras Galegas, e que baixo a denominación de “Mes dos libros” presenta unha serie de actividades de animación á lectura dirixidas aos diversos sectores do público. En concreto, este amplo programa de actividades abrangue as seguintes:- Mércores 25 de abril, ás 20,30 horas no Teatro Municipal: recital co poeta Alfonso Pexegueiro e os músicos Anxo Pintos e Quico Comesaña, do grupo Berrogüetto, no que recitaran poemas musicados do libro “A illa das mulleres loucas”, recentemente editado. - Mércores 2 de maio, ás 18,30 horas na Biblioteca: representación parateatral para nenos a cargo da animadora Ilda Amoedo que porá en escena, entre outras, a obra “La ratita presumida”. - Xoves 10 de maio, ás 20,30 horas na Biblioteca: presentación do libro de Camilo Franco “Palabras contadas” cun recital participativo co autor. - Martes 15 de maio, ás 20,30 horas na Biblioteca: charla literaria sobre “María Mariño, cosendo a conciencia da escrita”, a quen esta dedicado este ano o “Día das Letras Galegas” a cargo de Marga Romero, escritora e profesora de lingua galega no IES “San Paio” de Tui. Amais destas actividades a Biblioteca continuará coa súa habitual programación centrada no proxecto “Fun Kids” de animación á lectura en lingua inglesa para os rapaces máis pequenos e continua a súa actividade o Club de Lectura, aberto á participación de novos membros. Igualmente nestas datas continúan as visitas de grupos escolares á biblioteca para coñecer o seu funcionamento. Finalmente a Biblioteca municipal tudense no seu desexo de achegar á lectura a todos os cidadáns participará cun stand na feira do libro de Tui a celebrar o vindeiro 17 de maio, día das letras galegas, no Paseo da Corredeira, no decurso da que serán entregados os premios do concurso de caligramas recentemente convocado pola biblioteca tudense. Para o concelleiro de cultura tudense, Moisés Rodríguez, este programa de “Mes dos libros” patentiza a importante aposta que dende o Concello de Tui se realiza sobre a promoción la lectura como unha ferramenta básica para o desenvolvemento integral das persoas. Moisés Rodríguez Pérez anima aos veciños de Tui a participar destas actividades que ofrece a Biblioteca municipal tudense e que supoñen un achegamento, dende diversas perspectivas dende lúdicas ata máis formais, ao mundo do libro e a lectura.