Pronóstico de Tutiempo.net
Facebook Twitter Vimeo

Xornada de Portas Abertas no Consorcio do Louro polo Día Mundial da Auga

21/03/2018

Presentarase o III Concurso de debuxo infantil e inaugurarase o novo domo xeodésico adaptado para acoller as visitas 

Mañá xoves, 22 de marzo, o Consorcio de Augas do Louro, do que forman parte os concellos de Tui, Salceda, Mos e O Porriño,  celebrará a súa segunda xornada de portas abertas na estación depuradora de Guillarei coincidindo co Día Mundial da Auga.

Durante esta xornada realizarase a presentación do terceiro concurso de debuxo infantil, que este ano tratará sobre a potabilización co lema “A emocionante viaxe da auga dende a natureza ata a túa casa”. O premio para o gañador de cada Concello será unha Tablet Samsung de 7” e para os finalistas unha cámara dixital acuática. Participarán os rapaces de 3º e 4º de educación primaria dos Concellos de Mos, O Porriño, Salceda de Caselas e Tui, sendo o prazo de presentación dos debuxos o comprendido entre o 1 de Abril e o 20 de Maio.

A continuación, inaugurarase o novo domo xeodésico adaptado para acoller as visitas dos nenos aos que vai dirixido o concurso, que será utilizado para dar a coñecer as diferentes fases do ciclo da auga mediante vídeos explicativos.

Visitas á sede do Consorcio para o público en xeral

Calquera persoa que estea interesada en visitar a sede do Consorcio e o funcionamento das instalacións, terá ao seu dispor dúas quendas de visita ás 10:30 da mañá e ás 16:30 horas da tarde.

É necesario achegarse ás instalacións media hora antes do inicio das visitas para recibir a información necesaria sobre as medidas de seguridade que deben respectarse durante o percorrido, que inclúe a entrada ás galerías subterráneas que comunican as diversas partes da depuradora.